Поранешен ученик, сега вработена во ДУРДМОВ
Мојата приказна со Државното училиште „Димитар Влахов“
Мојот образовен пат во Државното училиште за деца и младинци со оштетен вид „Димитар Влахов“ започна на само седумгодишна возраст. Тоа беше мојата прва разделба со семејството, и морам да признаам дека ми беше многу тешко. Но, со текот на времето сфатив дека секоја тешкотија носи своја награда – денес, со сигурност можам да кажам дека сите предизвици вредеа.
Освен што добив квалитетно образование и совладав Брајово писмо, моето училиште ме научи и на многу животни лекции и вештини. Тука стекнав самостојност, изградив самодоверба и станав свој човек.
По завршувањето на средното образование, се вработив на Универзитетската клиника за физикална медицина и рехабилитација, каде што работев цели 16 години. Во текот на тој период, ја продолжив мојата едукација и дипломирав на Факултетот за специјална едукација и рехабилитација. Тоа ми овозможи да се вратам таму каде што сè започна – во училиштето што ми даде толку многу.
Денес, со голема чест и љубов, работам како специјален едукатор и рехабилитатор, давајќи им поддршка на новите генерации ученици, исто како што некогаш ја добив и јас.
