Во нашето училиште со почетокот на 2022 година започна интензивен процес на адаптација на стандардните учебници на Брајово писмо, достапни за слепите ученици. Идејата беше сите информации кои се наоѓаат во видниот учебник да се прилагодат на сознајните способности на слепото дете, при што тие би се нашле на еднакво рамниште како и нивните врсници без оштетување на видот. Текстуалните содржини од учебниците остануваат сосема исти, а преку Брајовиот програм се „преведуваат“ во Брајови букви. Процесот е комплексен и долг и за негова реализација се вклучени повеќе стручни лица кои работат тимски.
Во моментов Училиштето, педагошко – дефектолошката адаптација ја врши само на учебници одобрени од Министерството за образование и наука и Бирото за развој на образованието, кои се користат во нашето училиште, но и во наставата во редовните училишта. Согласно новите трендови и законски измени во Основното образование, како единствено Државно училиште за образование и рехабилитација на ученици со оштетен вид, обврзани сме да ги опслужуваме со Брајови учебници и инклудираните ученици во редовните училишта.
