Органи и Тела

Огранок на институцијата

Училишен Одбор

Училишниот одбор е орган на управување во училиштето. Одлуките на Училишниот одбор се донесуваат во интерес на воспитно-образовниот процес и развојот на училиштето со мнозинство гласови од вкупниот број членови на одборот кои имаат право на учество при гласањето и донесувањето на одлуките.

Директор

Александра Јаковчевска

Александра Јаковчевска е дел од нашето училиште за ученици со оштетен вид повеќе од 17 години. Кариерата ја започна во ученичкиот дом, продолжи како наставник по ориентација и мобилност, а потоа како стручен соработник за поддршка на учениците со оштетен вид вклучени во редовните училишта. Денес, таа успешно го води училиштето како директор, со визија за создавање инклузивна средина во која секој ученик ќе има можност да го истражи својот потенцијал и да ја изгради својата иднина.

Александра е дипломиран дефектолог, со магистратура од областа на специјалната едукација и рехабилитација, и моментално е докторанд на Филозофскиот факултет, Институтот за специјална едукација. Во текот на својата кариера, беше одговорна за меѓународната соработка на училиштето, воспоставувајќи значајни партнерства со институции од Балканот и Европа и активно учествувајќи во повеќе меѓународни проекти, вклучително Erasmus+. Со постојана посветеност на иновациите и соработката, таа ја води институцијата напред, користејќи ги сите достапни ресурси и технологии за подобрување на животот на учениците со оштетен вид.

Наставнички Совет

Наставничкиот совет на ДУРДМОВ “Димитар Влахов” го сочинуваат одделенски и предметни наставници, наставници во средно образование и нижо музичко училиште и стручните соработници. Како стручен орган на училиштето, Наставничкиот совет има клучна улога во процесите на одговорност и подобрување на наставата во нашето училиште. Наставничкиот совет работи со директорот за да им даде приоритет на најдобрите интереси на нашите ученици, да ги зајакнат можностите и способностите за образование според нивните способности.

Стручни Активи

Актив на одделенски наставници

Активот на одделенски наставници во училиштето има клучна улога во организирањето и спроведувањето на наставата. Овој актив работи на приспособување на наставните содржини според потребите на учениците, соработка со стручните соработници, организација на индивидуалната настава (сензорна соба, психомоторен кабинет) и подобрување на наставниот процес.

Актив на предметна настава

Активот на предметната настава ги координира наставниците кои предаваат различни предмети во предметна настава. Овој актив работи на унапредување на наставните методи, преку адаптација на материјалот, соработка помеѓу сите наставници за подобрување и унапредување на наставниот процес.

Актив на средно образование

Активот на наставници од средно образование се фокусира на специфичните потреби на учениците со оштетен вид во средношколската настава, со цел да ги подготви за понатамошното образование и вработување. Наставниците од овој актив се посветени на креирање на содржини кои се во согласност со интересите и можностите на учениците, како и развивање на нивните практични вештини.

Совет на Родители

Советот на родители во Државното училиште за рехабилитација на деца и младинци „Димитар Влахов“– Скопје има значајна улога во поддршката на образовно-рехабилитацискиот процес. Неговата главна функција е да обезбеди активно учество на родителите во донесувањето одлуки поврзани со воспитно-образовните активности, рехабилитациските програми и општото функционирање на училиштето. Членови на советот на родители се по еден родител од секое одделение.